Dwar ENISA - L-Aġenzija tal-Unjoni Ewropea għaċ-Ċibersigurtà

L-Aġenzija tal-Unjoni Ewropea għaċ-Ċibersigurtà, ENISA, hija l-aġenzija tal-Unjoni ddedikata biex jinkiseb livell komuni għoli ta’ ċibersigurtà madwar l-Ewropa kollha.

Stabbilita fl-2004 u msaħħa mill-Att tal-UE dwar iċ-Ċibersigurtà, l-Aġenzija tal-Unjoni Ewropea għaċ-Ċibersigurtà tikkontribwixxi għall-politika ċibernetika tal-UE, issaħħaħ l-affidabbiltà tal-prodotti, is-servizzi u l-proċessi tal-ICT bi skemi ta’ ċertifikazzjoni taċ-ċibersigurtà, tikkoopera mal-Istati Membri u l-korpi tal-UE u tgħin lill-Ewropa tħejji għall-isfidi ċibernetiċi tal-futur. Permezz tal-kondiviżjoni tal-għarfien, il-bini tal-kapaċità u s-sensibilizzazzjoni, l-Aġenzija taħdem flimkien mal-partijiet ikkonċernati ewlenin tagħha biex issaħħaħ il-fiduċja fl-ekonomija konnessa, biex iżżid ir-reżiljenza tal-infrastruttura tal-Unjoni, u, fl-aħħar mill-aħħar, biex iżżomm is-soċjetà u ċ-ċittadini tal-Ewropa siguri b’sens diġitali.

F’dinja li saret iperkonnessa, iċ-ċiberkriminali huma ta’ theddida sinifikanti għas-sigurtà interna tal-Unjoni Ewropea u s-sigurtà taċ-ċittadini tagħha online. Il-pandemija COVID-19 enfasizzat il-bżonn għal aktar sigurtà fid-dinja diġitali. In-nies żiedu l-preżenza online tagħhom biex iżommu r-relazzjonijiet personali u professjonali, filwaqt li ċ-ċiberkriminali approfittaw minn din is-sitwazzjoni, u kellhom fil-mira b’mod partikolari n-negozji b’kummerċ elettroniku u b’pagamenti elettroniċi, kif ukoll is-sistema tal-kura tas-saħħa.

L-Għoti tas-Setgħa lill-Komunitajiet

Iċ-ċibersigurtà hija responsabbiltà kondiviża. L-Ewropa tirsisti għal qafas ta’ kooperazzjoni transsettorjali u inklużiv għal kulħadd. L-ENISA għandha rwol ewlieni fl-istimulazzjoni tal-kooperazzjoni attiva bejn il-partijiet ikkonċernati taċ-ċibersigurtà fl-Istati Membri u fl-istituzzjonijiet u l-aġenziji tal-UE. Hija taħdem biex tiżgura l-kumplementarjetà tal-isforzi komuni, billi żżid valur lill-partijiet ikkonċernati, tesplora s-sinerġiji u tuża b’mod effettiv l-għarfien espert u r-riżorsi limitati taċ-ċibersigurtà. Il-komunitajiet għandhom jingħataw is-setgħa li jespandu l-mudell taċ-ċibersigurtà, għal din ir-raġuni l-ENISA ħolqot il-Mappa Istituzzjonali taċ-Ċibersigurtà tal-UE biex tidentifika u tippromwovi l-partijiet ikkonċernati ewlenin tagħha.

Politika taċ-Ċibersigurtà

Iċ-ċibersigurtà hija l-pedament tat-trasformazzjoni diġitali u l-bżonn tagħha huwa mifrux fis-setturi kollha, għalhekk jeħtieġ li titqies f’firxa wiesgħa ta’ oqsma u inizjattivi ta’ politika. Iċ-ċibersigurtà m’għandhiex tkun ristretta għal komunità speċjalista ta’ esperti tekniċi ċibernetiċi. Iċ-ċibersigurtà għalhekk għandha tkun integrata fl-oqsma kollha tal-politika tal-UE. Huwa essenzjali li jiġu evitati l-frammentazzjoni u l-ħtieġa għal approċċ koerenti filwaqt li jitqiesu l-ispeċifiċitajiet ta’ kull settur.

Kooperazzjoni Operattiva

Il-benefiċċji tal-ekonomija diġitali u s-soċjetà Ewropej jistgħu jinkisbu bis-sħiħ biss taħt il-premessa taċ-ċibersigurtà. L-attakki ċibernetiċi ma jafux fruntieri. Is-saffi kollha tas-soċjetà jistgħu jintlaqtu u l-Unjoni jeħtieġ li tkun lesta twieġeb għal attakki ċibernetiċi u kriżijiet ċibernetiċi enormi (fuq skala kbira u transfruntiera). L-interdipendenzi transfruntieri enfasizzaw il-ħtieġa għal kooperazzjoni effettiva bejn l-Istati Membri u l-istituzzjonijiet tal-UE għal rispons aktar rapidu u koordinazzjoni xierqa tal-isforzi fil-livelli kollha (strateġiċi, operattivi, tekniċi u tal-komunikazzjonijiet).

Bini ta’ Kapaċitajiet

Il-frekwenza u s-sofistikazzjoni tal-attakki ċibernetiċi qed jiżdiedu malajr, filwaqt li fl-istess ħin l-użu tal-infrastrutturi u t-teknoloġiji tal-ICT minn individwi, organizzazzjonijiet u industriji qed jiżdied b’mod rapidu. Il-ħtiġijiet għal għarfien u kompetenzi taċ-ċibersigurtà jaqbżu l-provvista. L-UE għandha tinvesti fil-bini ta’ kompetenzi u talenti fiċ-ċibersigurtà fil-livelli kollha, minn dawk li mhumiex esperti għall-professjonist b’ħiliet għoljin. L-investimenti għandhom jiffukaw mhux biss fuq iż-żieda tal-ħiliet taċ-ċibersigurtà fl-Istati Membri iżda anke li jkun żgurat li l-komunitajiet operattivi differenti jkollhom il-kapaċità xierqa biex jindirizzaw ix-xenarju tat-theddid ċibernetiku.

Soluzzjonijiet ta’ Fiduċja

Il-prodotti u s-servizzi diġitali jġibu magħhom benefiċċji kif ukoll riskji, u dawn ir-riskji jridu jiġu identifikati u mitigati. Fil-proċess tal-evalwazzjoni tas-sigurtà tas-soluzzjonijiet diġitali u l-iżgurar tal-affidabbiltà tagħhom, huwa essenzjali li jiġi adottat approċċ komuni, bil-għan li jintlaħaq bilanċ bejn il-ħtiġijiet tas-soċjetà, tas-suq, dawk ekonomiċi u taċ-ċibersigurtà. Entità newtrali li taġixxi b’mod trasparenti żżid il-fiduċja tal-konsumatur fis-soluzzjonijiet diġitali u l-ambjent diġitali usa’.

Prospettiva

Bosta teknoloġiji ġodda, li għadhom fil-bidu tagħhom jew qrib l-adozzjoni ġenerali, jibbenefikaw mill-użu ta’ metodi ta’ prospettiva. Permezz ta’ proċess strutturat li jippermetti d-djalogu fost il-partijiet ikkonċernati, dawk li jieħdu d-deċiżjonijiet u dawk li jfasslu l-politika jkunu jistgħu jiddefinixxu strateġiji ta’ mitigazzjoni bikrija li jtejbu r-reżiljenza tal-UE għat-theddid taċ-ċibersigurtà u jsibu soluzzjonijiet biex jindirizzaw l-isfidi emerġenti.

Għarfien

L-enerġija li ddawwar ir-rota taċ-ċibersigurtà hija l-informazzjoni u l-għarfien. Biex il-professjonisti taċ-ċibersigurtà jkunu effiċjenti fl-indirizzar tal-objettivi tagħna, biex naħdmu f’ambjent li dejjem jinbidel – f’termini ta’ żviluppi diġitali kif ukoll fir-rigward tal-atturi – biex naffaċċjaw l-isfidi ta’ żmienna, għandna bżonn proċess kontinwu ta’ ġbir, organizzazzjoni, sinteżi, analiżi, komunikazzjoni, u ż-żamma ta’ informazzjoni u għarfien dwar iċ-ċibersigurtà. Il-fażijiet kollha huma essenzjali biex jiġi żgurat li l-informazzjoni u l-għarfien jiġu kondiviżi u estiżi fi ħdan l-ekosistema taċ-ċibersigurtà tal-UE.

Ir-Regolament tal-ENISA huwa r-Regolament (UE) 2019/881 tal-Parlament Ewropew u tal-Kunsill tas-17 ta’ April 2019 dwar l-ENISA (l-Aġenzija tal-Unjoni Ewropea għaċ-Ċibersigurtà) u dwar iċ-ċertifikazzjoni taċ-ċibersigurtà tat-teknoloġija tal-informazzjoni u tal-komunikazzjoni u li jħassar ir-Regolament (UE) Nru 526/2013 (l-Att dwar iċ-Ċibersigurtà).

Bord tat-Tmexxija

Il-Bord tat-Tmexxija qed jiżgura li l-Aġenzija twettaq il-kompiti tagħha skont il-kundizzjonijiet li jippermettulha sservi f’konformità mar-Regolament ta’ twaqqif.

Learn more

Bord Eżekuttiv

Il-Bord Eżekuttiv qed jipprepara d-deċiżjonijiet li għandhom jiġu adottati mill-Bord tat-Tmexxija.

Learn more

Direttur Eżekuttiv

Id-Direttur Eżekuttiv huwa responsabbli għall-ġestjoni tal-Aġenzija u jwettaq id-dmirijiet tiegħu/tagħha b’mod indipendenti. Id-Direttur Eżekuttiv attwali tal-ENISA, Juhan Lepassaar, li assuma l-kariga f’Ottubru 2019.

Learn more

Network ta’ Uffiċjali ta’ Kollegament Nazzjonali

L-NLO jiffaċilita l-iskambju ta’ informazzjoni bejn l-ENISA u l-Istati Membri tal-UE.

Learn more

Grupp Konsultattiv

Il-grupp konsultattiv jiffoka fuq kwistjonijiet rilevanti għall-partijiet ikkonċernati u jressaqhom għall-attenzjoni tal-ENISA.

Learn more

Gruppi ta’ Ħidma ad hoc

Id-Direttur Eżekuttiv jistabbilixxi Gruppi ta’ Ħidma ad hoc magħmula minn esperti. Il-Gruppi ta’ Ħidma ad hoc qegħdin jindirizzaw kwistjonijiet tekniċi u xjentifiċi speċifiċi.

Ir-Regolament 2019/881 jipprevedi wkoll li l-ENISA għandha tgħin lill-Kummissjoni biex tipprovdi lis-segretarjat tal-Grupp Ewropew taċ-Ċertifikazzjoni taċ-Ċibersigurtà (ECCG) u l-ENISA għandha tipprovdi lis-segretarjat tal-Grupp tal-Partijiet Ikkonċernati taċ-Ċertifikazzjoni taċ-Ċibersigurtà (SCCG).